კაცხის მონასტრისა და მიმდებარე ტერიტორიის რეაბილიტაცია დასკვნით ფაზაშია

კაცხის მონასტრისა და მიმდებარე ტერიტორიის რეაბილიტაცია დასკვნით ფაზაშია

ჭიათურის მუნიციპალიტეტში, საქართველოს რეგიონული განვითარებისა და ინფრასტრუქტურის სამინისტროს მუნიციპალური განვითარების ფონდი,  კულტურული მემკვიდრეობის ძეგლის - კაცხის მონასტრის -  სარესტავრაციო-საკონსერვაციო  სამუშაოებსა და მონასტრის მიმდებარე ტერიტორიაზე ტურისტული ინფრასტრუქტურის ზონების მოწყობის სამუშაოებს აწარმოებს. პროექტის მიმდინარეობას, საქართველოს რეგიონული განვითარებისა და ინფრასტრუქტურის მინისტრი ზურაბ ალავიძე ფონდის აღმასრულებელი დირექტორთან-გალაქტიონ ბუაძესთან ერთად გაეცნო.
რეაბილიტაცია, მსოფლიო ბანკის მხარდაჭერით, რეგიონული განვითარების პროექტის ფარგლებში მიმდინარეობს. მისი ღირებულება  მილიონ ლარს აჭარბებს. 
კაცხის სამონასტრო კომპლექსის სარესტავრაციო-საკონსერვაციო სამუშაოები ითვალისწინებს: მონასტრის გარე ფასადსა და ინტერიერში დაზიანებული ადგილების აღდგენასა და საჭიროების შემთხვევაში დაკონსერვებას.
ძეგლის საკონსერვაციო სამუშაოების პარალელურად,  სოფელ კაცხში, სამონასტრო კომპლექსის წინ შენდება თანამედროვე სტანდარტების შესაბამისი  ტურისტული ცენტრი, რომელიც სრულად აღიჭურვება, გამართული საქმიანობისთივს საჭირო ავეჯით. პროექტი ითვალისწინებს ღია ტერასის მოწყობას, წყაროს აღდგენა-მოპირკეთებას, ეკლესიამდე მისასვლელი გზის რეაბილიტაციას, გარე წყალმომარაგების და კანალიზაციის სისტემების მონტაჟსა და ფერდზე, ტურისტებისთვის გადასახედი,  ღია აივნის მოწყობას. ასევე, გამოყოფილია ადგილი ავტოსადგომისთვის. 
პროექტის დასრულების შემდეგ, რომელიც მიმდინარე წლის აპრილის თვეში იგეგმება, სამონასტრო კომპლექსთან გაუმჯობესდება ტურისტული ინფრასტრუქტურა, რაც მეტ ტურისტს მოიზიდავს. ეს კი, თავისმხრივ ხელს შეუწყობს ადგილობრივი მოსახლეობის საოციალურ-ეკონომიკური მდგომარეობის გაუმჯობესებას.